صوڀراج پرسرام مينگهاڻي: مشهور اداڪار، هدايتڪار ۽ ليکڪ صوڀراج پرسرام مينگهاڻي، ايس. پي مينگهاڻي جي نالي سان پڻ مشهور هو. سندس جنم پهرين مارچ 1934ع تي ميرپورخاص سنڌ ۾ ٿيو. ورهاڱي وقت سنڌ مان لڏي وڃي ممبئي وسايائين. هيءُ تعليمي قابليت جي حوالي سان گريجوئيٽ هو. هن 30 کان مٿي سنڌي، هندي ناٽڪن ۾ اداڪاري ڪري پاڻ مڃايو، جن ۾ ‘انڊر سيڪريٽري’، ‘الجهن’، ‘مهمان’، ‘پل جو پتي’ ۽ ‘هيءَ يا هوءَ’ (سنڌي)، ‘اجنتاسي پئرس تڪ’، ‘ڪاليج هاسٽل’، ‘جئي گنڌا’، ‘شڪنتلا’ ۽ ‘روتي بيتي’ (هندي) قابل ذڪر آهن. هن 100 کان وڌيڪ ريڊيو جي ناٽڪن ۾ ڪم ڪيو. ان کانسواءِ 12 سنڌي ۽ هندي فلمن ۾ اداڪاري ڪئي، جن ۾ ‘هو جمالو’، ‘نقلي شان’، ‘رات هڪ طوفان جي’، ‘بدنام فرشتي’ ۽ ‘گهر ڪي لاج’ وغيره قابل ذڪر آهن. ايس. پي مينگهاڻي، سنڌي ۽ هندي ڊرامن ۾ اداڪاري ۽ هدايتڪاريءَ کان سواءَ گجراتي ۽ مرهٽي ناٽڪن ۾ پڻ اداڪار ۽ هدايتڪار طور ڪم ڪيو. کيس ڪيترائي اوارڊ مليا، جن ۾: ‘اکل ڀارت سنڌي ٻولي’ ۽ ‘ساهت سڀا’، ‘اکل ڀارت سنڌي پئنچات فيڊريشن مهاراشٽر سرڪار’ قابل ذڪر آهن.
1934.03.01 عيسوي
صوڀراج پرسرام مينگهاڻي جو جنم پهرين مارچ 1934ع تي ميرپورخاص سنڌ ۾ ٿيو.